„საერთაშორისო გამჭვირვალობა - საქართველოს”  კვლევაში საქართველოს პარლამენტის „გენდერული თანასწორობის საბჭოს საქმიანობის შეფასება”, შესწავლილია 2017 წლის იანვრიდან 2018 წლის ივლისის ჩათვლით პერიოდში[1] საბჭოს საქმიანობის შემდეგი  მიმართულებები:

• კანონმდებლობის გენდერული ანალიზის განხორციელება;
• საზედამხედველო ფუნქციის განხორციელება;
• ახალი ინიციატივების ადვოკატირება;
• საქმიანობის გამჭვირვალობის ხარისხი;
• საბჭოს მხრიდან ცნობიერების ამაღლების მიმართულებით განხორციელებული აქტივობი.

მე-9 მოწვევის პარლამენტის გენდერული თანასწორობის საბჭოს საქმიანობის პროცესში შემდეგი ტენდენციები გამოკვეთა:

მიღწევები

• მოქმედი საბჭოს საქმიანობა, წინა მოწვევის პარლამენტის საბჭოსთან შედარებით, გაუმჯობესდა როგორც ახალ საკანონმდებლო ცვლილებებზე მუშაობის, ასევე მოქმედი კანონმდებლობის გენდერული ანალიზის მიმართულებით;
• გენდერული თანასწორობის საბჭოს მიერ სამოქმედო გეგმის შემუშავება_[2];
• საბჭოს მიერ გახმაურებულ შემთხვევებზე რეაგირება განცხადებით_[3] და  პარლამენტის წევრის კითხვის უფლების გამოყენებით (მაგ. თბილისში 4 შვილის დედის მკვლელობის საქმესთან დაკავშირებით);
• საბჭოს მიერ საკანონმდებლო წინადადებების და ინიციატივების გენდერული ანალიზისათვის მეთოდოლოგიის შემუშავება
• საბჭოს დებულებით  გენდერული თანასწორობის საბჭოსთვის სპეციალური თანამშრომლის შტატის განსაზღვრა.

გამოწვევები

• საბჭოს არ განუხორციელებია 2018 წლის სახელმწიფო ბიუჯეტის საპილოტე გენდერული ანალიზი, რაც სამოქმედო გეგმით ნაკისრ ვალდებულებას წარმოადგენდა_[4];
• სრულად ვერ შესრულდა სამოქმედო გეგმით გათვალისწინებული ვალდებულება -  ხუთის  ნაცვლად, მხოლოდ ორი  კანონპროექტის გენდერული ზეგავლენის შეფასება განხორციელდა
• გეგმით გათვალისწინებული ვალდებულების ფარგლებში არ მომხდარა საკანონმდებლო ცვლილებების ნაწილის ინიცირება (მაგ., შრომის კოდექსში ცვლილება, სტამბოლის კონვენციიდან გამომდინარე საკანონმდებლო ინიციატივები)

რეკომენდაციები

• კანონმდებლობაში გენდერული საბჭოს ვალდებულებად უნდა განისაზღვროს კანონმდებლობის გენდერული ზეგავლენის მიმართულებით ანალიზის განხორციელება. მიზანშეწონილია საბჭოს ინსტიტუციური გაძლიერება, რათა მან სრულფასოვნად შეძლოს მნიშვნელოვანი კანონპროექტების/რეფორმების ანალიზი;
• საბჭომ გენდერული თანასწორობის სფეროში საერთაშორისო და ადგილობრივ დონეზე ნაკისრი ვალდებულებების შესრულების მონიტორინგის მეთოდოლოგია და მონიტორინგის შედეგები პერიოდულად უნდა  წარუდგინოს პარლამენტს;
• პარლამენტის რეგლამენტის ახალ პროექტში განმარტებითი ბარათის ერთ-ერთ კომპონენტად უნდა განისაზღვროს გენდერულ თანასწორობაზე ზეგავლენის შესახებ ინფორმაციის წარმოდგენა (ასეთის არსებობის შემთხვევაში);
• მიზანშეწონილია რომ საბჭომ, კომიტეტების მიერ კანონპროექტებზე განხორციელებული გენდერული ზეგავლენის ანალიზის შესახებ პერიოდული ინფორმაცია პარლამენტის ვებგვერდზეც გამოაქვეყნოს;
• ბიუჯეტის პროექტის გენდერული ანალიზი ყოველწლიურად  უნდა ხორციელდებოდეს;
• საბჭომ უნდა გააძლიეროს აღმასრულებელი ხელისუფლების გენდერულ საკითხებთან დაკავშირებული საქმიანობის ზედამხედველობა, გასცეს რეკომენდაციები და აკონტროლოს მათი შესრულება.