დღეს, 2 ოქტომბერს, 14 საათზე, სასტუმრო ჰოლიდეი ინში ორგანიზაციებმა – „სამართლიანი არჩევნებისა და დემოკრატიის საერთაშორისო საზოგადოება“, „საქართველოს ახალგაზრდა იურისტთა ასოციაცია“, „საერთაშორისო გამჭვირვალობა – საქართველო“ და „ჯამპსტარტ ჯორჯია“ – საქართველოს არჩევნების პორტალის პრეზენტაცია გამართეს.

ElectionsPortal.ge არასამთავრობო ორგანიზაციების მიერ ერთობლივად შექმნილი ვებგვერდია, რომელიც დაინტერესებულ საზოგადოებას აწვდის მრავლისმომცველ და კომპლექსურ ინფორმაციას არჩევნების შესახებ საქართველოში. დარღვევების რუკა მომხმარებელს საშუალებას აძლევს, თვალი მიადევნოს სამი ორგანიზაციის მიერ გამოვლენილ საარჩევნო დარღვევებს ონლაინ და თავადვე გამოაქვეყნოს მის მიერ დაფიქსირებული ინციდენტები ელექტრონულად და უფასო SMS-ის გამოგზავნის საშუალებით ნომერზე 90039.

„ჩვენი ორგანიზაციებისთვის მნიშვნელოვანია მოქალაქეთა განათლება საარჩევნო საკითხებზე. ამ მიზნით პორტალზე შევქმენით სპეციალური გვერდი, სადაც საარჩევნო საკითხებთან დაკავშირებული საინფორმაციო ვიდეოებია ატვირთული,“ – ამბობს ნინო ლომჯარია, ორგანიზაცია „სამართლიანი არჩევნებისა და დემოკრატიის საერთაშორისო საზოგადოების“ აღმასრულებელი დირექტორი.

„საერთაშორისო გამჭვირვალობა – საქართველოს“ აღმასრულებელი დირექტორი ეკა გიგაური მიიჩნევს, რომ „არჩევნების პორტალი მნიშვნელოვანი ინიციატივაა, რადგან შესაძლებლობას აძლევს მოქალაქეებს თვითონაც მიიღონ მონაწილეობა არჩევნების მონიტორინგში. ამგვარად, ვცდილობთ ხელი შევუწყოთ სამოქალაქო აქტივიზმის განვითარებას საქართველოში.“

Data.ElectionsPortal.ge-ის მეშვეობით კი, შესაძლებელია 2008 წლის შემდეგ ჩატარებული თითოეული არჩევნების შედეგების ნახვა სხვადასხვა ინდიკატორით, როგორიც არის: აქტივობა, არჩევნების შედეგები, ცალკეული პარტიის შედეგები და სხვა. ვებგვერდზე მონაცემები წარმოდგენილია რუკების სახით სხვადასხვა გეოგრაფიულ დონეზე, რომელიც მოიცავს რეგიონებს, საარჩევნო ოლქებსა და უბნებს.

ლუის ნავარომ, NDI-ს საქართველოს ოფისის დირექტორმა, პრეზენტაციაზე განაცხადა: „ვებგვერდი დააინტერესებს ყველა ადამიანს, ვისაც პოლიტიკა აინტერესებს. მონაცემთა ბაზა პოლიტიკურ პარტიებს დაეხმარება საარჩევნო კამპანიის დაგეგმვაში და საშუალებას მისცემს წინა არჩევნების შედეგების გათვალისწინებით განსაზღვრონ მათი პოტენციური მხარდაჭერის არეალები. ვებ-გვერდი, ასევე, დაეხმარება მკვლევარებს საარჩევნო ტენდენციების გარკვევაში. აქ საინტერესო ინფორმაცია ყველასთვის მოიპოვება.“

​ ElectionsPortal.ge-სა და  ​Data.ElectionsPortal.ge-ს შექმნა და განვითარება შესაძლებელი გახდა ამერიკელი ხალხის მხარდაჭერით ამერიკის შეერთებული შტატების საერთაშორისო განვითარების სააგენტოს USAID-ის მეშვეობით. პროექტი ფინანსდება საერთაშორისო საქმეთა ეროვნულ-დემოკრატიული ინსტიტუტის NDI-ს მიერ და ევროკავშირის  მხარდაჭერით. არჩევნების მონაცემების პორტალის მხარდამჭერია შვედეთის საერთაშორისო განვითარების და თანამშრომლობის სააგენტო (Sida).