„საერთაშორისო გამჭვირვალობა-საქართველომ“  სარეკლამო ბაზარზე 2020 წელს არსებული მდგომარეობა და ძირითადი ტენდენციები შეისწავლა. კვლევაში მიმოხილულია, თუ როგორ აისახა „კოვიდ 19-ის“ გავრცელების შეკავების მიზნით დაწესებული შეზღუდვები და საპარლამენტო არჩევნების დროს პოლიტიკური პარტიების მიერ რეკლამისთვის დახარჯული თანხები სარეკლამო ბაზარზე.

ყოველწლიურ ანგარიშში შემდეგი მიგნებები გამოიკვეთა:

• 2020 წელს, 2019 წელთან შედარებით, სატელევიზიო სარეკლამო ბაზარი 7.7 მლნ ლარით (11%) გაიზარდა და 75.2 მლნ ლარი შეადგინა. ზრდა ძირითადად საპარლამენტო არჩევნების დროს პოლიტიკური პარტიების მიერ სატელევიზიო რეკლამაში დახარჯულმა თანხამ გამოიწვია;
• საარჩევნოდ პოლიტიკურ რეკლამაში გაწეული ხარჯების გარეშე, სატელევიზიო სარეკლამო ბაზრის მოცულობამ 60.7 მლნ ლარი შეადგინა;
• პოლიტიკური სატელევიზიო რეკლამისთვის 2020 წელს უპრეცენდენტოდ მაღალი თანხა,14.5 მლნ ლარი დაიხარჯა. სატელევიზიო რეკლამაში ყველაზე მეტი თანხა  - 5.1 მლნ ლარი - „ქართულმა ოცნებამ“ დახარჯა, მას მოსდევს „ნაციონალური მოძრაობა“ 3.1 მლნ ლარით, „ლელო საქართველოსთვის“ - 2.4 მლნ ლარით, „გიორგი ვაშაძე-სტრატეგია აღმაშენებელი“ - 1.1 მლნ ლარით, „ევროპული საქართველო“ - 1.1 მლნ ლარით და „პატრიოტთა ალიანსი“ - 1 მლნ ლარით;
• მმართველმა პარტიამ ფასიანი პოლიტიკური რეკლამა რეიტინგულ ოპოზიციურ ტელევიზიაში „მთავარ არხზე“ საერთოდ არ განათავსა და რეკლამის უმეტესობა (54%) სახელისუფლებო ტელეკომპანია „იმედის“ ჰოლდინგში მიიტანა. თავის მხრივ, „ნაციონალურმა მოძრაობამ“ რეკლამის ძირითადი ნაწილი (88%) „მთავარ არხზე“ განათავსა და ფასიანი რეკლამა ტელეკომპანია „იმედს“ საერთოდ არ დაუკვეთა;
• ყველაზე მეტი სარეკლამო შემოსავალი 2020 წელს ტელეკომპანია „იმედმა“ მიიღო - 29 მლნ ლარი, მას მოსდევს „რუსთავი 2“ - 12.8 მლნ ლარით, „მთავარი არხი“ - 11.1 მლნ ლარით და ტელეკომპანია „პირველი“ - 6.2 მლნ ლარით;
• ყველაზე დიდი სარეკლამო კლება ბოლო წლების განმავლობაში ტელეკომპანია „რუსთავი 2-ს“ აქვს. ის 2018 წელს 30.4 მლნ ლარით სარეკლამო შემოსავალით პირველი კომპანია იყო ბაზარზე, 2020 წელს კი რეკლამიდან მხოლოდ 12.8 მლნ ლარი (58%-ით ნაკლები) მიიღო. შემოსავლების კლება ტელევიზიაში ახალი მფლობელისა და მენეჯმენტის მისვლის პერიოდიდან იწყება;
• 2020 წელს კერძო ტელევიზიების ჯამურმა შემოსავალმა 138.5 მლნ ლარი შეადგინა, რაც 2019 წელთან შედარებით 45.5 მლნ ლარით (49%) მეტია. ეს ძირითადად გამოწვეულია, როგორც ზოგადად სარეკლამო ბაზრის გაზრდით, ასევე „მფლობელის შემოწირულობისა“ და „სხვა არასამაუწყებლო“ შემოსავლების კომპონენტის მნიშვნელოვანი ზრდით;
• კორონავირუსის პანდემიამ ყველაზე დიდი დარტყმა რადიოებს მიაყენა. მათ სარეკლამო შემოსავლები,  2019 წელთან შედარებით, 2 მლნ ლარით (23%) შეუმცირდათ და 2020 წელს 6.8 მლნ ლარი შეადგინა, ხოლო ჯამური შემოსავალი 1.9 მლნ ლარით (20%), 7.6 მლნ ლარამდე შემცირდა. რადიოებს შორის ყველაზე შემოსავლიანი (3.8 მლნ   ლარი) ჰოლდინგი „ფორტუნა“ იყო.